السلام عليكم ورحمـــة الله وبركاته 

ازيكم يا بنات يارب تكونو كلكم بخيــــــر وبكامل الصحة والعافية

ويارب يحفظ مصر واهل مصر من كل فتن وسوء اللهم آمــــــين

الموضوع دا مهم جدا جدا جدا جدا وياريت تقرو كل حرف فيه هوا طويل بس مفيد

حبيت اضيفلكم موضوع ياارب يارب يكون في ميزان حسناتي .. وعاوزة افيدكم عشان تساقط الشعـــــر الى بيحصل بعد الترانسفورميشن دا بيكون سببه حاجات قبل وحاجات بعد بتحصل مش مضبوطـــه ودي من تجارب بنات حصل معاهم بالفعل

أحب أقول اول معلومة مهمة جدا جدا 

يابنات الترانسفورميشن مش علاج للشعـــر اطلاقا ... ومبيوقفش التساقط .. ومهوش كيراتين ..

يعني الى تقولك الكيراتين او البروتين بيوقف التساقط قوليلها سلميلي عالبتنجان 

عشان كدا متخليش واحده تقولك الترانسفورميشن هيوقف التساقط عشان كدا هانسلم عالبتنجان والكانتالوب سوا

بصو ياقمرات الترانسفورميشن دا .. ماده بتفكك جزيئات الشعر وبتحوله من مجعد الى أملس ..

يعني الشعر جزيئات الشعر تحت الميكرسكوب ... بتكون معقده ومترتبه ترتيب معين .. بتيجي مادة الفرد دي .. بتفكك الجزيئات .. وبعدين بنقوم بعملية الكبس ... بالبيبي ليس .. الجزيئات بتترتب وبتتنظم عشان يكون مفرود بيحافظ على الشعر وهوا بيفتح المسام بيدخل فيه بروتينات وحرير من المنتجات الى بنستخدمها وعمالين بنرطب فيه وبنعوضه عن كل جزء بيتفتح بنعوضه فيه حرير يسد الثغرات دي 

طبعا مفيش هنا اي نوع من العلاج .. و الشعر كدا جزيئاته مترتبه بترتيب كتير غير الطبيعه الى ربنا خلقنا بيها .. عشان كدا لازم نحاذر جدا جدا جدا واحنا بنستخدم منتجات مع الشعر ومانسئش ليه 

طيب بالنسبة للبروتين .. دا علاج للشعر بنزود بيه جزيئات الشعر عشان التكسير والتقصيف والتدمير الى ف الشعر بيعالج الشعراية بنعتبر ان الشعر بيكون من جواه فيه فراغات والبروتينات دي بتشبع الفراغات عشان تصلح الشعر التالف .. بيحصل نسبة من الفرد لان الجزيئات بتترتب بشكل جزئي ومؤقت .. ودا السبب بقا الى بيخلي الشعراية ترجع بعد 4 شهور زي ما كان لان الجزيئات رجعت لطبيعتها بس الشعر خلاص خد كفايته من العلاج والحمد لله

طيب نيجي بقى نشوف سبب التساقط مع فرد الترانسفورميشن

أولا : مشاكل الشعر ما قبل الترانسفورميشن الى بسببها الشعر بيتساقط

1_ الشعـــر يكون مفــرود بفرد ايطالي ... مسامات وجزئات الشعر متفتحه بالفعل ... ولو حطينا نوع قوي من الترانسفورميشن اكيد هيجي يفتح مسام الشعر اكتر ماهو متفتح .. هيتقطع مش هيتفتح

زي الى بيجي يقص ورقه بالمقص وهيسيب طرفها ملزوقة .. وهوا ميعرفش ان في حد قبله قاصص لحد النص .. والمقص اوتوماتيك شغال ... اخد الورقة لاخرها وقطعها للاخر ولو في حاجه كمان تتقطع هاتتقطع

هوا دا الى بيحصل بالضبط ... لازم تقولي للخبيره وانتي كمان تكوني عارفه ان الشعر لو معمول فرد قبل كدا مسامه متفتح لازم لازم ياخد نوع فرد ضعيف جدا ربما يكون اخضر .. او ازرق او يمكن كمان يحتاج اخف من الاخضر ويتخفف

ولو الفرد لسه معمول قريب وفي تساقط اصلا مينفعش تحطي ترانسفورميشن .. عشان محدش يجي يقول المنتج وحش

يبقا اقل حاجه نستنى عليها للفرد الايطالي 6 شهور ... ويتعمل الجذر باللون المناسب لطبيعة الشعر واللى معمول فرد ايطالي ياخد لون اقل 

2_ الهاي لايت ... بردو انا عمالة اتكلم عن جزيئات الشعر والصبغات ...

الصبغات الغوامق يا جماعه ممكن نتعامل معاها ان الشعر بيور متلعبش فيه .. لان الاسود والبني الغامق مبيفتحش جزيئات الشعر ولا بيلعب ف مسام الشعر .. ودا بردو في حالات الشعر المقاوم ... الى بيستوعب الفرد الاحمر .. الى بيكون مجعد قوي قوي .. لكن نخلي بالنا في شعور ضعيفه قوووي حتى لو مش مصبوغة

وكل ما بنفتح بني بني فاتح اشقر _ اشقر فاتح _ اشقر فاتح جدا .. تلجي .. ذهبي

كدا خلاص احنا وصلنا الشعر على حافة الهاوية زي الورقة الى اتكلمت عنها من شوية بس الفرق ان الترانسفورميشن بيوصل الشعر على حافة الهاوية بطريقة وتكنيك منظم جدا لكن كدا الهاي لايت فتح فتح فتح ..

طيب ايه عاوزة تحطي ترانسفورميشن ويبقا الشعر سليم ؟؟؟

خلي بالك ... لو عامله هاي لايت على شعر غامق ... وعملتي باللون الاخضر وشعرك طبيعته مقاومة

مش هيفـــرد كويس .. عشان الى معمول هاي لايت ... هيتفرد وممكن يقع كام خصلة كن .. ,الى لونه غامق ... مش هيستوعب الفرد لان الفرد اضعف منه

ومينفعش خبيرة التجميل تيجي تخصلك شعرك بالفرد .. ودا مستخيل ... فـ ريحي دماغك .. لو عملتي فرد مع الهاي لايت .. يا اما تعملي بنوع خفيف مش هيرضيكي نتيجته

يا اما هتعملي بلون قوي وقولي الله يرحم الخصل كلها الى متفتحه

لو عامله شعرك كلو لون واحد حتى لو فاتح اعملي ترانسفورميشن ضعيف بس خلي بالك والخبيرة لازم تخلي بالها من الشعر كويس 

في حالة ان الشعر نصه مصبوغ والجذور طلعت بقالها كام شهر .. الجذور تاخد اللون المناسب للشعر والمصبوغ بالفاتح ياخد لون اقل من الفرد 

3_ حنـــة الفرد ...

دي بقا الهاوية في حد ذاتها يا جماعة

اصلا الشعر الله يرحمه .. ماتت كل الجزيئات الى فيه واللي موجود دا حلاوة روح .. انتي اصلا لو قولتي للشعر سلامو عليكو هيـــــــــــــــــقع وهينهار ...

لو الشعر معمول حنة فرد من سنة مثلا .. مش هنيجي ناحيته باي ترانسفورميشن نهائيا هنعمل الجذور بس

لو الشعر لسه مبقالوش شهر ولا شهرين ولا تلاته مش هينفع عشان الجذر اصلا لسه ضعيف ومتشبعبش غذا من فروة الراس

يبقه حنة الفرد مش اقل من سنة عشان تعملي ترانسفورميشن تمام كدا وميجيش على الحنة ابدا ...

4_ الشعر الضعيف الى عمال يتساقط ؟؟؟

نخلي بالنا واحنا بنعمله طبعا نبعد عن الاحمر كل البعد .. ونعمل تيست بالازرق لانو ساعات مبيستحملهوش الشعر الضعيف دا ونعمل تيست بالازرق

طيب نخلي بالنا كويس ونبعد نص سنتي زياده عن السنتي الى بنسيبه في الجذور وهوا بيتوزع عشان ميقطمش الشعر

طيب دول تقريبا اهم حاجات بيتأثر بيها الشعـــــــــــــــر لو معمول بالحاجات دي قبل الترانسفورميشن

ثانيا : عوامل تساقط الشعر بعد الترانسفورميشن

1_ الشعر يتصبغ او يتعمله هاي لايت بصبغـــة عادية او بودرة تفتيح عادية

ياجمااااااااااااااااااااعة مسام الشعر متفتح زي ما قولنا .. وانتو جايين تفتحو تاني .. طبعا هيتقطم ...

2_ الحرااااااااااااااااارة وانا بقا عامله الموضوع دا مخصوص عشان الحرارة ...

انا مبتكلمش عن السشوار الكتير الى اكيد غلط على الشعر .. يا فتوكة انتي اصلا فردتي شعرك لزمته ايه السشوار

بس انا بردو مبتكلمش على السشوار 

انا بتكلم على الكبريت ... النار ... الولعــــة ... 

محدش يقولي ايه دا يارودي الى بتقوليه دا ... حد هيولع ف شعره ...

ايوة يا جماعه .. المكواة بتاعة زمان دي الحديد الى بيتعمل بيها الكيرلي الى بتتسخن على النار وتنزل على الشعر

تششششششششششششششششششششش

واحده عملت ترانسفورميشن عندي كان شعرها رائع راااااائع ..

وعملته .. مش عاوزة اعيب على الكوافير الى لسه بيستخدم المكواة دي هيا فعلا مؤذية للشعر جدا والناس بتوع زمان كانو بيقولولنا انه شعرهم كان بيتحرق بسببه .. ما بالك شعر معمول ترانسفورميشن ...

يتحرق كدا بالنار ..؟؟

طبعا طبعا هيقع هيتقطم .. هيتفتح مسامة زياده زيادة الزيااااااادة وهيقع

ارجوكم تنتبهو من الحراره الزيادة للشعر وحتى لو البيبي ليس مش عماله على بطال .. ومش بدرجة حرارة عالية قوي عشان منفتحش المسام زيادة .. يعني مش على 240 او 200 لالالا خليها على الاخف وتستخدمو قبلها سائل حرير

خلاص لازم تخلو بالكم كويس جدا ...

3_ انواع شامبوهات رديئة .. هيا ممكن هتسبب تساقط و ممكن يقصف الشعر .. وياريت تستخدمو طقم العناية بتاع تشي عشان المسام وهوا متفتح محتاج يتعوض بروتينات وحرير ودا بيعوضه طقم عناية تشي 

بلاش الكوافيره الى تقولك مش لازم طقم تشي .. ممكن تكون مش عاوزة تكلف عليكي مش هنظلمها .. بس مش هتبوظي الطبخه عشان شوية ملــــــــــــــــــــــح 

يابنات انا كدا خلصت .. والموضوع دا هديه لكل البنات وكل خبيرات التجميل كمان ..

خيركم من تعلم العلم وعلمه

وانا مبحبش ابخل بأي معلومة عشان لو جتلي واحده خطأ صغير دمرلها شعرها هكون مستائه عشانها ..

ما بالك انا عارفه سبب دمار الشعر ايه واخبي عنكم 

ياريت التقييم عشان الموضوع محتاج يتثبت عشان اكبر عدد يشوفه ..

وتدعولي ربنا يرزقني السعادة وراحة البال ويوسع رزقي 

المصدر:مواقع ومنتديات